《台語荒漠甘泉（全羅版）》

"Tī Chú lāi-bīn ū pêng-an"

作者 陳清俊 翻譯

listen



Káu ge̍h jī-poeh (Káu ge̍h jī-cha̍p-poeh ji̍t)

"Hō͘ lín tìam-tī góa ū pêng-an." (Iok-hān 16:33)
Hoan-lo̍k kap sīu chiok-hok sī ū tōa-tōa ê hun-pi̍at. Pó-lô keng-le̍k kè koaiⁿ-kìm, thòng-khó͘, hi-seng, koh khó͘-lān kàu ke̍k-tíam, Tān-sī tùi chiah ê, i tit-ti̍oh Sīong-tè ê chiok-hok. Só͘-ū ê hok-khì lóng tī i ê sim tiong, sìⁿ-mīa tiong, tī i khùn-lân ê khôan-kéng tiong chîaⁿ-chòe sū-si̍t.

Ì-tāi-lī tōa chhut-mîa oai-o-lín (sío-thê-khîm) choan-ka, Paganini, ū chi̍t pái ían-chàu, tī koan-chìong phah phok-á siaⁿ kiat-sok ê sî, hoat-hīan oai-o-lín m̄-sī i sīong-hó sīong pó-kùi hit ki. Sū-si̍t sīong hit-ki oai-o-lín kun-pún m̄-sī i ê. I gōng-ngi̍ah chi̍t ē, chīu bīn-tùi koan-chìong kóng chhut sū-si̍t, i só͘ ēng ê m̄ sī i ê oai-o-lín. I li̍ah chòe sī hē tī āu-tâi, tngg i tī āu-tâi ê sî, chiah chai ū lâng thau i ê oai-o-lín khì, ōaⁿ chi̍t ki pháiⁿ phín-chit ê ga̍k-khì hō͘ i.

Paganini tùi āu-tâi koh chhut lâi kàu tâi-chêng, khai-sí hìong thiaⁿ-chìong kóng ōe. "Chu-ūi lú-sū, chu-ūi sian-siⁿ, hīan-chāi góa beh hìong lín chèng-bêng, im-ga̍k m̄-sī chāi-tī ga̍k-khì ê lāi-bīn, sī chāi-tī sim-lêng lāi-bīn." I tôaⁿ chhut hiah hó thiaⁿ ê im-ga̍k, sī tùi hit ki phín-chit chha ê ga̍k-khì chhut-lâi, thiaⁿ-chìong thiaⁿ kah hīⁿ-khang phak-phak-phak. In ê phok-á-siaⁿ chha-put-to ōe hō͘ chhù-kòa hian khí-lâi hiah tōa. Sī i khak-si̍t chèng-bêng im-ga̍k put-chāi ga̍k-khì, sī tùi i ka-kī ê sim-lêng lāi hoat-chhut-lâi!

Le̍k-kè chhì-līan kap khó-gīam ê sìn-tô͘ ah, lín ê sù-bēng sī kîaⁿ tī sè-kài ê bú-tâi-chêng, hìong thiⁿ-tē só͘ ū it-chhè lâi píau-bêng, sìⁿ-mīa ê im-ga̍k put-chāi chiu-ûi ê khôan-kéng kap gōa-chāi ê sū-bu̍t, sī chāi-tī lín ka-kī sim-lêng lāi.

Nā-sī sim-tiong ū pêng-an,
Tang-thiⁿ ê po̍k-hong-seh īa sī chhàn-lān,
Pòaⁿ-mî ê sih-nà īa ōe chìo kngg sè-kan,
Múi chi̍t ê o̍ah-mi̍h chhut sin koh hoaⁿ-hí lâi chheng-chàn,
Múi chi̍t châng chhīu, chi̍t tè chi̍oh, gêng-chiap thiⁿ-kngg chho͘ tàn,
Nā-sī sim-tiong ū pêng-an. --- Charles Francis Richardson


附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com