《台語荒漠甘泉(全羅版)》

| | | 轉寄

"Kap Chú kiat-ha̍p"

listen

Káu ge̍h jī-chhit (Káu ge̍h jī-cha̍p-chhit ji̍t)

"Góa í-keng chhē-tio̍h sio̍k-hôe i ê." (Iok-pek-kì 33:24)

Sio̍k-lêng ê i-tī sī sio̍k-lêng ê seng-oa̍h. Ki-tok chòe lán ê Chú, chiū-sī Ki-tok ê sìⁿ-miā tī lán sin-thé ê lāi-bīn. Lán ê thé kap Ki-tok ê thé liân-ha̍p chòe chi̍t thé, tùi lán ê sin-thé piáu-hiān chhut I ê sìⁿ-miā. I koh-oa̍h êng-kng ê thé sī chin si̍t. Kap I tùi sí koh-oa̍h siâng-khoán ê sū-si̍t, oa̍h-oa̍h ê Chú kap sin, taⁿ chē tī Siōng-tè ê chiàⁿ-pêng.

Tâng chit ê Ki-tok, tòa só͘-ū ê lêng-sèng kap tōa koân-lêng, sio̍k-tī lán. Lán sī I ê chi-thé, I ê bah, I ê kut. Lán nā siong-sìn chit ê sū-si̍t, lán thang tùi Siōng-tè ê kiáⁿ ê sìⁿ-miā tit-tio̍h lán ê sìⁿ-miā.

Chhin-ài ê Chú, kiû lí pang-chān góa liáu-kái koh si̍t-hêng chit chat keng-bûn "To̍k-to̍k seng-khu ... sī ūi-tio̍h Chú, Chú iā sī ūi-tio̍h seng-khu." (I Ko-lîm-to 6:13) --- A.B. Simpson

"Lí ê Siōng-tè Iâ-hô-hoa tī lí ê tiong-kan, chiū-sī choân-lêng ê, chín-kiù ê." Jī-cha̍p gōa nî chêng, chit chat sèng-keng hō͘ góa thâu chi̍t pái chai sìn-sim i-tī ê tō-lí, i-tī góa ià-siān ê sin-thé kap sim-su. Hiān-chāi góa pí í-chêng mn̂g khui khah khui, hō͘ éng-oa̍h ê Ki-tok sî-sî khek-khek chìn-ji̍p góa siū sio̍k ê sin-thé. I ji̍p-lâi ēng I ê lêng chhiong-móa góa, sù góa le̍k-liōng, kap oa̍h-le̍k. Hō͘ góa choân-sin chìn-ji̍p tī "sin ê thiⁿ sin ê tōe" (Khé-sī-lio̍k 21:1) ê kéng-kài.

Lēng-gōa chi̍t chat kóng, "Thiàⁿ Chú lí ê Siōng-tè" (Lō͘-ka 10:27) Nā-sī Chú sī góa ê Siōng-tè, tī choân-lêng Siōng-tè ê lāi-bīn ê it-chhè iā sī góa ê. I tòa tī góa lāi-bīn, I só͘-ū it-chhè góa iā ū. "Chì-tōa choân-lêng ê Siōng-tè, bān-kun ê Iâ-hô-hoa, sī I ê miâ." (Iâ-lī-bí 32:18) I chin sī choân-lêng ê Siōng-tè, sī tī góa lāi-bīn ê Siōng-tè. Chhin-chhiūⁿ thài-iông sī Thài-iông-hē ê tiong-sim, I sī tī góa lāi-bīn ê tiong-sim, oa̍h-oa̍h ê Sèng-pē, Sèng-kiáⁿ kap Sèng-lêng. I sī góa lāi-bīn saⁿ-têng ê hoat-tiān-ki, tī góa ê si̍t-thé kang-chok, pau-koat góa ê náu kap sîn-keng hē-thóng.

Jī-cha̍p-it nî lâi, chit ê chin-lí tùi góa m̄-nā sī oa̍h-thiàu-thiàu ê sū-si̍t, koh hoat-tián kàu khah chhim khah kāu. Hiān-chāi góa í-keng chhit-cha̍p hè, tī chin chōe hong-bīn pí saⁿ-cha̍p gōa hè ê sî khah siàu-liân, khah ióng-chòng. Taⁿ góa khò Siōng-tè ê le̍k-liōng teh seng-oa̍h. Sin, sim nn̄g hong-bīn ê sêng-chiū pí kè-khì jīm-hô sî-chūn lóng ke chi̍t pē. Ēng chi̍t-pòaⁿ ê khùi-la̍t, góa ê sin, sim, lêng ê sìⁿ-miā chiū ná chi̍t kháu ê chíⁿ-chúi, éng-oán móa-móa. Bô-lūn thiⁿ-khì ū sím-mi̍h ke̍k-lia̍t ê piàn-hòa, góa káng-tō, kàu-tok, mî-ji̍t ê lú-hêng, lóng bōe siān, ná chhin-chhiūⁿ hé-chhia cheng-khì-ki chhiong-móa cheng-khì chin ū-la̍t lâi thui-sak hé-chhia hiah iông-īⁿ.

Góa siū kiù-sio̍k, sèng-hòa, i-tī ê sin, hûn kap lêng,
Hun-pa̍t chòe sèng hiàn tī Chú, Lí bīn-chêng,
Oân-oân choân-choân ê châi-lêng,
Kap Lí ê êng-kng kiat-liân choân it-seng.
Ha-lé-lu-iá! --- Henry Wilson


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:book@pctpress.com