《台語荒漠甘泉（全羅版）》

 | | | 轉寄

"Siōng-tè ê èng-ún"

作者 陳清俊 翻譯 2007.08.12

listen


Poeh ge̍h cha̍p-jī (Poeh ge̍h cha̍p-jī ji̍t)

"í-keng ū pó-pòe kap ke̍k tōa ê èng-ún siúⁿ-sù lán." (Ṳ Pí-tek 1:4)

Chō chûn ê lâng chō hó chi̍t chiah chûn, i kiám chí-sī kā i khǹg tī chûn-khò͘ nih? Tong-jiân m̄-sī; i chō chûn sī beh hō͘ chûn thang khì hâng-hái, khì kiâⁿ tī hái-siōng bīn-tùi hong-éng. Sū-si̍t-siōng, i chō-chûn ê sî, nā bô kè-ōe chûn ōe tí-tng, ū kàu ióng tòng ōe-tiâu kông-hong tōa-éng, i chiū bô kàu chu-keh chō chûn.

Siâng-khoán, Siōng-tè pôe-iúⁿ lí chòe sìn-tô͘, I it-tēng beh chhì-giām lí. I sù hō͘ lí èng-ún, kiò lí siong-sìn, I hi-bāng lí chià-tio̍h chiah ê èng-ún khì èng-hù jîn-seng tiong ê po̍k-hong hái-tô. Lí kiám siūⁿ I ê èng-ún sī ké ê, ná chhin-chhiūⁿ chi̍t niá kiù-seng-i, tī siong-tiàm lāi chin hó khòaⁿ, the̍h kàu tī chúi-téng khiok bô lō͘-ēng mah?

Lán ū khòaⁿ tio̍h cheng-bí ê kiàm, chóng-sī bōe thang chòe sio-thâi lâi ēng, iā kìⁿ kè chòe chong-sek ê ôe, bōe thang chòe kiâⁿ lō͘ ēng. Tān-sī Siōng-tè ê ôe sī ēng thih, ēng tâng chòe ê, lán thang chhēng i, chi̍t lō͘ kiâⁿ kàu thian-tông iā bōe bôa-ui khì. Lán chhēng I ê kiù-seng-i thang tī Tōa-se-iûⁿ siû-chúi chi̍t chheng pái iā m̄-kiaⁿ tîm lo̍h-khì. I ê èng-ún ê ōe sī ài lí khì chhì, khì ēng.

Ki-tok siōng bô hoaⁿ-hí lâng kong-khai sìn I, khiok bô ēng I. I hoaⁿ-hí lán kā I sú-iōng, in-ūi I kap lâng ê li̍p-iok sī sù-hok-khì ê, m̄-sī beh hō͘ lâng him-sióng ê, khòaⁿ ê, sī ài lán kā ēng. Chú Iâ-so͘ ê siúⁿ-sù sī beh hō͘ lán hiān-chāi chiū kā i sú-iōng, lí sī-m̄-sī chīn chek-jīm lâi sú-iōng ah?

Ah, Chhin-ài ê pêng-iú, góa kiû lí m̄-thang chiong Siōng-tè ê èng-ún tòng-chòe khǹg tī phok-bu̍t-koán ê pó-pòe mi̍h, ài kā i sú-iōng, chiâⁿ-chòe ji̍t-siông an-ia̍t seng-oa̍h ê chu-goân. Bô lūn sím-mi̍h sî lí su-iàu, chiū sìn-khò Siōng-tè. --- Charles H. Spurgeon

Kàu Siōng-tè èng-ún ê chhim-chhù,
Chīn lí só͘ ài khì chhú,
I ê sù-hok sī hong-hù,
I só͘ kóng ê ōe it-tēng si̍t-hiān múi chi̍t kù.

Siōng-tè thái-ōe tùi I só͘ èng-ún ê tāi-chì kóng m̄ neh?


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com.tw