《台語荒漠甘泉（全羅版）》

"Kàng hō͘, sù hok"

作者 陳清俊 翻譯

listen

La̍k ge̍h cha̍p-gō͘ (La̍k ge̍h cha̍p-gō͘ ji̍t)

"Sīong-tè hō͘ góa tī góa sīu-khó͘ ê tōe-hngg heng-ōng." (Chhòng-sè-kì 41:52)

Chi̍t ūi si-jîn khīa tī I ê thang-á chêng teh khòaⁿ gōa-bīn teh lo̍h sai-pak-hō͘, sī chin tōa hō͘, lo̍h kàu chin lī-hāi. Chóng-sī si-jîn só͘ khòaⁿ ê, m̄-sī kan-ta chi̍t chūn hō͘ nā-tīaⁿ, i khòaⁿ ti̍oh sīu hō͘ lūn-te̍k ê thó͘-tē hoat-chhut kok-chíong ê hoe-lúi, chôan-tē chhiong-móa súi kap phang-bī. I gîm kóng,

Lo̍h ê m̄-sī hō͘, sī chúi-sian-hoe,
Múi-tih hō͘ tih tī soaⁿ-phîaⁿ, khòaⁿ-ti̍oh chi̍t tōa phìan ía-hoe,
Ou-hûn tà lâi, jia-khàm chôan-chhī thong-koe,
Lo̍h ê m̄-sī hō͘, sī mûi-kùi hoe.

Chòe Sīong-tè ê kíaⁿ-jî, khó-lêng tú-teh sīu ti̍oh chhì-līan, tùi Sīong-tè kóng, “Sīong-tè ah, kin-mî lo̍h chiah tōa ê hō͘, chhiau-kè góa só͘ ōe jím-sīu ê. Chiong góa ê kè-ōe chhiong khì, góa sit-bāng, thiat-té sit-pāi. Góa phī-phī-chhoah ê sim sīu ke̍k-tōa ê thòng-khó͘, ai-siong. Khó͘-thàng ê hō͘, tāng-tāng phah tī góa ê lêng.”
Pêng-íu, lí ôan-chôan gō͘-kái lah! Sīong-tè bô ēng hō͘ lâi phah lí, sī kàng hō͘ sù hok-khì. Siong-sìn Sīong-tè ê ōe, lí beh chai, tōa hō͘ tiong, sī ōe chhut-hīan si̍ok-lêng ê hoe-lúi. Chiah ê hoe pí lí tī bô hong bô hō͘ ê sìⁿ-mīa só͘ khui ê hoe khah phang khah súi.
Tngg lí khòaⁿ-kìⁿ hō͘, lí kíam ū khòaⁿ ti̍oh hoe mah? Chiah ê khó-gīam teh hō͘ lí sīu-khó͘, lí kíam chai, tī lí ê jîn-seng tiong ū bí-lē sìn-sim ê hoe ōe chhut-hīan. Lí sīuⁿ beh síam-pī thòng-khó͘, Sīong-tè só͘ khòaⁿ-ti̍oh ê sī tùi lí ê lêng beh ū tông-chêng, un-jîu ê sim hoat-seng. Ke̍k-tōa ê siong-pi khó͘-lān hō͘ lí ê sim kiu-thè, tān-sī Sīong-tè beh hō͘ lí ê sìⁿ-mīa koh-khah hong-sēng.
Pêng-íu, m̄-sī! Hìong lí lo̍h ê hō͘ m̄-sī thòng-khó͘, sī un-jîu, thìaⁿ-thàng, tông-chêng, un-chû, jím-nāi, téng-téng Sèng-lêng só͘ siⁿ ê chíong-chíong hoe-lúi kap ké-chí. Lí sìⁿ-mīa ê lêng só͘ tit ti̍oh ê hong-hù, tī sè-kan it-chhè an-e̍k tiong sī bōe thang sán-seng ê. --- J.M.M.

Po̍k-hong-hō͘ ê koa-si

Khīa-khîm tī khong-khì tiong pêng-chēng,
Ji̍t-kngg lo̍h tī chheng-chheng phang-hoe téng,
Ko͘-to̍k lú-kheh Iu-lū têng-têng,
Thàu-chá kàu àm teh chìan-cheng,
Tùi bô-koa ê khîm-hîan sīuⁿ beh hoat-chhut go̍at-seng,
Tôaⁿ koh tôaⁿ īa bô hóan-èng,
Ti̍t kàu kîong-hong po̍k-hō͘ lûi-tân bô thêng,
Chú ê chhíu hōaⁿ tī po̍k-hong bīn-chêng,
Hòan-chhíⁿ líau bí-bīau im-ūn,
Kîong-hong ná chìan-sū khí heng-hùn,
Hoat-chhut sèng-lī íong-kám ê hō-kak,
Hong-hō͘ chhìuⁿ chhut Sīong-tè thìaⁿ ê im-ga̍k.


附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw