《台語荒漠甘泉（全羅版）》

"Tit si̍t-kó͘ pe kôaiⁿ"

作者 陳清俊 翻譯

listen

Saⁿ ge̍h chhoe-káu (Saⁿ ge̍h káu ji̍t)

"Tùi....téng-bīn khòaⁿ-lo̍h-lâi." (Ngá-ko 4:8)

Ki-tok-tô͘ pē tōa ê tāng-tàⁿ, khiok hō͘ in ū nn̄g-ki si̍t. Thiaⁿ ti̍oh, ná chin mâu-tún, che khiok sī sīu chiok-hok ê chin-lí. Tāi-pi̍t sīu ti̍oh tōa khó-gīam ê sî, án-ni âu-kìo kóng, "Gōan góa tit-ti̍oh si̍t, chhin-chhīuⁿ kap, góa chīu pe khì, tit-ti̍oh an-jîan khīa-khí." (Si-phian 55:6) Jîan-āu, tī i be̍k-síong ôan ê chìn-chêng, i ná tit-ti̍oh khak-sìn i beh ū si̍t-kó͘ ê gōan-bōng í-keng ta̍t-ti̍oh, só͘-í sòa chiap lo̍h-khì kóng, "Ti̍oh chiong lí ê tàⁿ sìa hō͘ Îa-hô-hoa; I beh hû-chhî lí, I éng-éng bô hō͘ gī-lâng îo-choah." (Si-phian 55:22)
"Tāng-tàⁿ" tī góa ê sèng-keng chù-kái ni̍h kái-soeh chòe "Îa-hô-hoa só͘ hō͘ lí ê". Sèng-jîn ê tàⁿ sī Sīong-tè só͘ hō͘ i ê, só͘-í khò sìn-sim chīu ōe kî-chek-sèng pìan-chòe chi̍t tùi si̍t. Sim sīu tāng-tāng ap-le̍k ê lâng "beh chhin-chhīuⁿ eng-chíau thí-si̍t pe-kôaiⁿ." (Í-sài-a 40:31) -- tùi "Chú-ji̍t-o̍h sî-pò"

Chi̍t ji̍t kîaⁿ tī koe-ni̍h,
Kip teh pān-sū, thâu-nó͘ sīuⁿ pah-hāng tāi-chì,
Ná ba̍t-hûn, tōa-hō͘ beh pìaⁿ lo̍h-khì,
Ka-kī khó-lîn ka-kī.
Khó-lîn ê,
Tāi-chì hiah chōe,
Seng-o̍ah hiah pháiⁿ kè,
Tāng-tàⁿ teh tī sim-té.
Thài-îong ná li̍at-hé,
Khì-chhia phùn o͘-ian sái kè,
La-pah, siaⁿ-im chi̍t sì-kòe,
Thô͘-hún tò-chhù pe.
Cheng-sîn sīu ge̍k-thāi bōe líau,
Sim ìa-sīan, chhau-hôan, khùn-jíau,
Si̍t-chāi tòng bōe tîau.

Ah! Kan-khó͘ bōe-ôan bōe-soah,
Ap-le̍k si̍t-chāi siuⁿ tōa,
An-ùi ka-kī mā bô khah cho̍ah,
Bû-nāi lâi chiap-sīu che seng-o̍ah.
Chit-sî, ū sòe-sòe siaⁿ thiaⁿ-kìⁿ:
"He sī beh thê-seng lí, m̄-sī ap-chè lí,"
Góa chiah chai, sīuⁿ-hoat ū siang-bīn,
Góa bô teh tī tāng-tàⁿ ê ē-bīn,
Sī tī i téng-bīn,
Tāng-tàⁿ m̄-sī kìo góa pē,
Sī hō͘ góa chē.
I ê kè-ōe,
Chai góa lêng-le̍k bōe-ōe,
Su-ìau un-tían kap le̍k-līong,
Ná chhīu su-ìau ji̍t-kngg, kam-lō͘ lâi sêng-tíong,
Īa ná bōe chîaⁿ-hêng ê íong,
Tùi Chin-sîn bô kàu-gi̍ah ê sìn-gíong,
I ê chû-ài chān góa lêng chīam-chīam íong.

Nā-sī tó-tī tāng-tàⁿ ē, chīu sí-bông,
Nā-sī ló͘-le̍k khīa khí-lâi ê, ōe sìⁿ-mīa heng-ōng,
Tāng-tàⁿ pìan-chòe lán ê siang si̍t,
Thê-seng lán tìam tī I ê un-tían chin-si̍t.
Nā bô i, lán éng-óan tī chhían-sìn ê sî-ji̍t.

Oh! Thiⁿ ê ò-bīau thong-ta̍t,
Beh teh lán ê tāng-tàⁿ sī chòe thê-seng lán ê khùi-la̍t,
Góa ê lêng ah! seng-kôaiⁿ, seng-kôaiⁿ ū kè-ta̍t,
M̄-thang tī tāng-tàⁿ ē, teh siong-pi,
Sīong-tè ê ōe-gú sī ji̍p thian-thui ê só-sî,
Kap Ki-tok tan-to̍k chòe-hé khīa-khí,
Chē tī tāng-tàⁿ téng-bīn, hioh tī I sin-piⁿ. -- Mary Butterfield

附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw