《台語荒漠甘泉（全羅版）》

"Lîu-sim koan-chhat thèng-hāu"

作者 陳清俊 翻譯

listen

Sì ge̍h chhoe-la̍k (Sì ge̍h la̍k ji̍t)

"Góa beh khīa chíu-kiⁿ-lâu, khīa tī îaⁿ-chē koan-khòaⁿ, khòaⁿ I tùi góa kóng sím-mi̍h ōe." (Hap-pa-kok 2:1)

Lán nā bô lîu-sim koan-khòaⁿ ǹg-bāng, kan-ta thèng-hāu Thiⁿ-pē ê pang-chān, ū sím-mi̍h ì-gī? Bô ǹg-bāng, chīu bōe tit-ti̍oh pang-chān. Nā-sī lán bô tùi Pē Sīong-tè hia tit-ti̍oh le̍k-līong kap pó-īu, sī in-ūi lán bô khì chhē-kîu. Tùi thiⁿ lâi ê pang-chān sī sûi-sî ū, lán nā bô khì chù-ì, lîu-sim, I ōe khin-khin-á tùi lán ê sin-piⁿ liu khì.Lán sit-khì ki-hōe, sī in-ūi lán bô tī chíu-kiⁿ-lâu hn̄g-hn̄g chù-ì khòaⁿ i lâi ê hûn-jiah. Lán bô ki̍p-sî phah khui lán ê sim-mn̂g, lāi-sim bô khǹg ǹg-bāng. Bô kéng-séng síu-bāng ê lâng, sī tit bōe ti̍oh pang-chān. Tī lí it-seng bô-lūn tōa-tōa sòe-sòe ê sū, lóng ài choan-sim síu-bāng Sīong-tè.
Si̍ok-gú kóng, “Chù-ì thèng-hāu Sīong-tè un-tían ê lâng, éng-óan bōe bô tit-ti̍oh I un-tían ê ki-hōe. Lán nā hóan-bīn lâi kóng, “M̄-bat chù-ì thèng-hāu Sīong-tè un-tían ê lâng, éng-óan kìⁿ bōe ti̍oh Sīong-tè ê un-tían. Lo̍h hō͘ ê sî, nā bô chiong chúi-tháng hē tī gōa-bīn sîn hō͘, chīu éng-óan khioh bōe-ti̍oh hō͘-chúi.
Lán ài Sīong-tè si̍t-hīan I ê èng-ún, pit-su ka-pē jīn-chin chù-ì, bōe sái chhín-chhín chhái-chhái. Ká-sú ū chi̍t ê lâng khì gûn-hâng, khì chin-chōe pái, the̍h chi-phìo kàu thang-á-kháu, beh hō͘ gûn-hâng ê chhut-la̍p-ôan, ka-kī koh siu tò-tńg-lâi, bô beh khì tūi-hīan hīan-kim, gûn-hâng jîn-ôan khó-lêng ōe chhíaⁿ I chhut-khì.
Lâng kàu gûn-hâng it-tēng ū sū beh pān, in the̍h chhut chi-phìo tùi-ōaⁿ hīan-kim, si̍t-si̍t chāi-chāi chiong sū pān ôan, chīu lī-khui. In nā bô beh chiong chi-phìo the̍h hō͘ kūi-tâi jîn-ôan, kan-ta teh thó-lūn chi̍t ê chhiam-jī jōa chîaⁿ súi, chi-phìo téng-bīn ê tô͘-īuⁿ jōa chîaⁿ hó khòaⁿ, che sī lōng-hùi chhut-la̍p-ôan ê sî-kan, gûn-hâng sī bô hoan-gêng chit chíong lâng. In eng-kai sī chiong chi-phìo lâi ōaⁿ hīan-kim, bô the̍h ti̍oh chîⁿ bōe lī-khui, kín-kín pān-sū, pān ôan chīu kín-kín lī-khui, chit chíong lâng chiah sī gûn-hâng só͘ hoan-gêng ê.
Chin put-hēng, chin-chōe lâng tī kî-tó ê thāi-tō͘ sī bô jīn-chin, sim-tiong pēng bô kî-thāi Sīong-tè ê hôe-tap, chit chíong ê kî-tó sī lōng-hùi sî-kan. Lán ê Thiⁿ-pē sī ài lán chhiat-chhiat si̍t-si̍t jīn-chin kap I kau-pôe. --- Charles H. Spurgeon
“Lí ê ǹg-bāng īa bōe-ōe tōan-cho̍at.” (Chim-gîan 23:18)
附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw