《台語荒漠甘泉（全羅版）》

"Bô khòaⁿ-kìⁿ lâi sìn"

作者 陳清俊 翻譯

listen


Poeh ge̍h sam-it (Poeh ge̍h saⁿ-cha̍p-it ji̍t)

"Hiah ê bô khòaⁿ-kìⁿ lâi sìn ê lâng, ū hok-khì." (Iok-hān 20:29)

Sīong-tè ài lán chù-tīong bô khòaⁿ-kìⁿ ê sū-bu̍t, che sī chin tīong-ìau ê, in-ūi sîong-sîong lán ōe hō͘ só͘ khòaⁿ-kìⁿ ê lâi khi-phìan. Nā-sī Pí-tek beh tī chúi-bīn kîaⁿ, chīu kîaⁿ, beh ēng sîu-chúi, chīu sîu, I bōe-ōe nn̄g-hāng lóng beh. Chi̍t chiah chíau-á beh pe, chīu ài phiah-khui lî-pa, chhīu-ki, kap tē-bīn, siong-sìn i ê si̍t ū la̍t lâi pe, i nā kiaⁿ siak-sí, chiap-kūn tē-bīn pe, éng-óan pe bōe hó-sè.

Sīong-tè hō͘ A-pek-la̍h-hán ēng ôan i pún-sin ê le̍k-līong, hong-hoat, hō͘ i chai khò pún-sin lóng bōe thang chòe sím-mi̍h, i su-ìau jīm-tēng ka-kī ê sin-thé “chhin-chhīuⁿ í-keng sí ê” (Hi-pek-lâi 11:12), jîan-āu hō͘ Sīong-tè lâi pān-lí it-chhè, i bô khò ka-kī, chí-ū sìn-khò Sīong-tè ê sî, chīu “koh chhim-sìn Sīong-tè ōe chîaⁿ I só͘ èng-ún ê.” (Lô-má 4:21)

Sīong-tè só͘ kà-sī lán ê, I seng tû-khì lán cheng-ka chū-ngó͘ ê mi̍h, ti̍t-kàu lán o̍h ti̍oh bô khò chiah-ê, chí-ū sìn-khò I. Líau-āu I ōe tī si̍t-chè seng-o̍ah tiong si̍t-hīan I ê ōe, chīu chhin-chhīuⁿ lán sìn-sim só͘ sìn ê hiah-nih chin-si̍t. --- A.B. Simpson

Bô kîu chèng-bêng I ê ōe sī chin,
Bô kîu góa ti̍oh seng khòaⁿ-kìⁿ chiah sìn,
Sìn I ê ōe kù-kù sī si̍t, sī chin,
Tī I Bô pìan ê ōe, góa khīa-chāi siong-sìn. --- E.M. Winter

附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com